పొద్దుటే మా వారి సుప్రభాతం వినిపించి, మెలకువ వచ్చింది అంటే ఏంటో అనుకునేరు ..
తనకింద పని చేసే కంట్రాక్టర్లను తిడుతూ ఉంటారు. వాళ్ళు పొద్దునే 6 గం " కి ఫోను చేసి ముందు రోజు జరగని పని గురించి చెపుతారు ..ఇంకా మావారు తన కొచ్చిన జంధ్యాల తిట్లన్నీ ఉపయోగిస్తూ ఉంటారు ...పోనీ వాళ్ళని మానిపించి కొత్తవాళ్ళని పెట్టుకోమే పెట్టుకోరు , వాళ్ళు కూడా పని మానేసి వెళ్ళరు ....ఒక సారి మా వారు లేని టైం లో ఫోను వస్తే అడిగాను ఎందుకయ్యా సార్ తో తిట్లు తింటారు ..వేరే పని చూసుకోవచ్చుగా అని దానికి అతని సమాధానం ...ఏందో మేడం సార్ తిడితేనే మాకు జోష్ వస్తది ..లేదంటే ఆ రోజంతా "dull గా ఉంటుంది,హమ్మో వీళ్ళ అనుబంధం బంగారం కాను అనుకున్నాను .
ఎలాగోలా వీలు చూసుకుని ఇవాళ నేను చెప్పిన పని చేయించు , దగ్గరలో ఎవరైనా మంచి పనివాడు ఉన్నాడేమో అడుగు అని చెప్పి ఆఫీసుకి వెళ్ళిపోయారు మా వారు .
హమ్మ ఇప్పటికిప్పుడు ఎలా ? ఆలోచిస్తుండగా వచ్చింది పనమ్మాయ్ రమ.
మంచి "carpenter ఎవరైనా ఉన్నారా ఇక్కడ "main దర్వాజాకి లాక్ , ఇంకా door stoppers పెట్టించాలి .
మా ఆయనున్నాడు , ఆ పనే చేస్తాడు చెప్పేదా ? ...
హమ్మయ్య బ్రతికించావ్ తల్లి త్వరగా రమ్మని చెప్పు ..
ఒక అరగంటకి పేద్ద బేగు వేసుకుని వచ్చాడు , ఏం చేయాలి ...అడిగాడు ..చెప్పాను ఏమి చేయాలో
ఏమి లేవు ఇంత చిన్న పనికి నన్ను పిలిచారు ....అని కాస్త విసుగుతో మొహం పెట్టి ..సర్లే కాని పాపం మళ్ళీ మీరు ఎవరినని వెతుకుతారు అని జాలి ,దయ తలిచి నాలుగు తలుపులకి పెట్టటానికి ఒక రెండు గంటలు కుస్త్తీ పట్టి ఎలాగో బిగించాడు ...main door కి magic eye కూడా పెట్టమని అడిగాను ..మళ్ళి అదేంటి అని అడిగాడు . వాడికి వివరించి చెప్పాను ..ఓ అదా...భూతాల్లా కనిపిస్తారు మనుషులు , భూతద్దం అని చెప్పాలి దాన్ని ...ఏందమ్మా అది కూడా తెల్వదా నీకు .
సరెలే...... నాకు తెలీదు కాని.... తెచ్చి బిగించు ...అన్నాను ..ఏం జేస్తాం తప్పుద్దా
"lunch జేసి వచ్చి పెడ్తా అని వెళ్ళి ఒక రెండు గంటలు గడచిన తర్వాత తీసుకు వచ్చి నానా తిప్పలు పడి రకరకాల యోగాసనాలు వేసి బిగించాడు , అయింది చూస్కో అన్నాడు .
వెళ్ళి చూస్తే వాడి తెలివి తేటలకి నాకు ఒకరకమైన వింత నవ్వు వచ్చింది . వాడు అటుది ఇటు తిప్పి పెట్టాడు ..
ఇదేంటయ్యా ఇలా పెట్టావ్ , ఇటు ఉండాలి కానీ .....అమ్మా నువ్వు చెప్పింది నిజమే గానీ ...కొంచం వెరైటీగా ఉంటుంది అని ఇలా చేసా ..మంచిగుంది కదా ఉండనీ అన్నాడు .
ఇంకా నయం సాయంత్రం సారొస్తడు ఆయనకి చూపించు నీ మేధావి తనం నాకు కాదు ,ముందు మంచిగా చేస్తేనే నీకు పైసలిస్తా లేదా...మీ ఆవిడని కూడా పని మానిపించేస్తా జాగ్రత్త బెదిరించాను .. ఆపమ్మా నీ తల్లి చేస్తా కాని ...గట్టిగా అరవకు ..అని గొణుక్కుంటూ మార్చి చేసాడు ...
వాడికి డబ్బులు ఇచ్చేటప్పుడు పాపం ఇంతసేపు కష్టపడి చేసాడు కదా అని కొంత జాలి కలిపి ఎక్కువేసి ఇచ్చాను .కానీ వాడు నేను ఎంత అడిగానో అంతే ఇవ్వండి ఎక్కువేమి వద్దు అని డబ్బులు తీసుకు పోయాడు . "time చూస్తే అయ్యగారు ఉదయం 10 గంటలకి వచ్చి మధ్యలో "lunch బ్రేకు తీసుకుని పని అంతా చేసేసరికి సాయంత్రం 5 అయింది .
(ఏమో మరి నాకు మాత్రం ఏం తెలుసు ఎవరు చేసినా అంతే సమయం పడుతుందేమో)
సాయంత్రం మా వారు వచ్చి శివతాండవం చేసారు ఏంటీ door stoppers పెద్దవి పెట్టమంటే కొబ్బరి పుచ్చులంత చిన్నవి పెట్టాడు ..గాలి బలానికి ఇవి ఆగవు ...
రేపు వచ్చి కొంచం పెద్దవి పెట్టమను ...దేవుడా మళ్ళీ రేపు వీడిని భరించాలా........పోనిలే పాపం మళ్ళీ రమ ఫీల్ అవుతుంది .
మళ్ళీ వాడిని పిలిచి ఒక పూటంతా కూర్చుని తిరిగి చేయించాను, దానికి కూడా వాడు తెగ పని ఉన్నట్టు , నా వల్ల అది పాడై పోయినట్లు ఫీల్ అయ్యాడు .
ఒక ఆదివారం నాడు మా వారికి నగేష్ (carpenter)తో మళ్ళీ పని పడింది ... పోస్టుబాక్స్ కావాలిగా వాడిని చేయమని అడుగుదామా అన్నారు . ఏమో బాబు నాకు తెలీదు మీరే పిలిచి అడగండి . తర్వాత నన్నుతిట్టొద్దు .అని తప్పించుకున్నాను .అయ్య గారు ఉండేది మా ఇంటికి ఎదురుగానే , సార్ పిలుస్తున్నాడు అని బాల్కనీ లోంచి పిలిచాను ,ఒక అరగంటకి పూలరంగడి లా తయారయి వచ్చాడు .
ఏదైనా ఫంక్షన్ కి వెళ్తూ వచ్చాడేమో అనుకున్నా, మా వారు అడగనే అడిగారు ఎక్కడికనా వెళ్తున్నావా ....చిన్న పనుంది ....అందుకే పిలిచాను అన్నారు .లేద్ సార్ మీ పిలచారనే వచ్చాను ఏంటో చెప్పండి చేసి పడేస్తా అన్నాడు .
మా వారికి వాడి డ్రెస్ కోడ్ నచ్చింది...బావుంది నీ మార్కెటింగ్ స్కిల్ నచ్చింది .
నాకు ఒక పోస్ట్ బాక్స్ తయారు చేసి ఇస్తావా?
అన్నా , నీ సొంత వెరైటీ ఆలోచనలు దీనిలో పెట్టకు అన్నాను నవ్వుతూ ..వెంటనే వాడు నా
కేసి కోపంగా చూసి .
మావారి తో ....అలాగే సార్ ఒక రెండు రోజులు "time ఇవ్వండి నేనేంటో నిరూపిస్తా మీకు అని వెళ్ళిపోయాడు . అన్న మాట ప్రకారం రెండు రోజుల తర్వాత పోస్ట్ బాక్స్ తయారు చేసి ఇచ్చాడు .
నిజం చెప్పాలంటే చాలా బాగా చేసాడు వాడు చక్కగా తయారు చేసి దానికి చిన్న చిన్న లతలుగా చెక్కి ఇచ్చాడు ...
మా వారికి కూడా నచ్చింది కానీ ...ఏముంది ఏం బాలే అన్నారు వాడిని ఉడికిద్దామని ...వాడి మొహం చిన్నబోయింది ...అదేంది సార్ అట్లా అంటారు నేను కష్టపడి చేసాను రాత్రంతా కూడా నిద్రపోలేదు ...అందరు బాగుందన్నారు ....ఏమ్మా బాలేదా,నువ్వే న్యాయం చెప్పు అన్నాడు అక్కడుంటే నన్ను ఇద్దరూ క్రికెట్ ఆడుకుంటారని ..ఒక వెర్రి నవ్వు నవ్వి లోపలికి వెళ్ళిపోయాను .
మొత్తానికి వాడితో కాసేపు వాదించి వాడికి డబ్బులిచ్చి పంపించారు .
మొత్తానికి భలే పనిమంతుడు వాడు అనుకుంటూ నవ్వుతూ అన్నారు .
ఆ ముక్కేదో వాడి ముందు అంటే కాస్త సంతోషించే వాడు కదా అన్నాను ,అలా అంటే ఇంక వాడు మునగ చెట్టు ఎక్కి రేపు ఏదైనా పని చెప్తే నువ్వు చెప్పినట్టు వెరైటీ గా చేస్తాడు అందుకే అలా అన్నాను అన్నారు .
కొన్నాళ్ళకి వాడిని మళ్ళీ పిలవాల్సొచ్చింది , మా హాల్లో కొత్త ఫేన్ బిగించాలి అందుకు మా వారు నగేష్ నే పిలిచారు ...అదేంటి వాడిని పిలవడం వాడు కార్పెంటర్ అయితేను అని doubt వచ్చి మా వారిని అడిగాను ..వాడికి తెల్సిన వాళ్ళు ఉంటారు కదా వాడే తీసుకు వస్తాడు అని చెప్పారు. మొత్తానికి వాడొకడిని వెంట పెట్టుకుని వచ్చాడు ..
మీరు చూస్తూ ఉండండి నేను చిటికిలో చేసేస్తా అన్నాడు .
సర్లే నాకెందుకొచ్చిన గొడవ నాకు fan ముఖ్యం అనుకుని జరిగే తతంగం చూడటానికి ఎదురుచూస్తూ కూర్చున్నాను . మా వారు వాడి మీద నమ్మకంతో హాయిగా రెండు రోజుల న్యూస్ పేపర్లన్ని ముందేసుకుని చదువుకుంటూ కూర్చున్నారు ...నేను మధ్య మధ్యలో వాడి హావ భావాలు గమనిస్తూ ఉన్నాను ...ఐన్స్టీన్ లాగా తెగ ఆలోచిస్తూ పని చేసేస్తున్నాడు హడావుడిగా.......వీడిని చూస్తూ కూర్చుంటే వంట అయ్యేలా లేదు అని నేను వంట చేయడానికి లోపలికి వెళ్ళి పోయాను .
ఒక గంట తర్వాత పిలిచాడు సారూ ఒకసారి లోపలి కొచ్చీ స్విచ్చు నొక్కండి అంటూ ..మా వారు స్విచ్చు నొక్కి పైకి చూసారు , అంతే దిమ్మ తిరిగింది ఒక్కసారిగా ...గాట్టిగా కేకలు వేస్తూ ఎక్కడున్నావ్ ఒక్కసారి ఇలారా అని పిలిచారు ....ఏమైందో అని హడావుడిగా వెళ్ళి చూసాను మా వారి కళ్లు పైకే చూస్తున్నాయ్ ...ఏంటా అని చూస్తే ..ఇంకేముంది నాకు నవ్వాగలేదు పగలబడి ఆపకుండా నవ్వుతూనే ఉన్నాను ...వాడు బిగించిన ఫాను తన గమనాన్ని మర్చిపోయి వెనక్కి తిరుగుతోంది ...సరే ఏమవుతుందో చూద్దామని స్పీడు పెంచుదామని 5 లో పెట్టా అది టక్కున ఆగిపోయింది .హ హ హ అది కూడా మా హీరో గారు తిరకాసు గా బిగించారు .
వాడికి కూడా నవ్వొచ్చింది ...పైగా వాడు ఇదేంటి సార్ ఇలాంటి ఫాను తెచ్చావ్ .... reverse లో తిరుగుతోంది అన్నాడు .పాపం ఏం అంటారు వాడికి పిలిచి పని ఇచ్చినందుకు వాడికొక నమస్కారం పెట్టి డబ్బులు ఇచ్చి పంపిచారు .
మళ్ళి అవన్నీ ఊడపీకి వారు ,నేను కూర్చుని మళ్ళీ బిగించాము .
కొన్నాళ్ళకి మళ్ళీ అదే "electrician పిలిచి ...కాలింగ్ బెల్ మోగటం లేదు దాని సంగతి చూడు అన్నారు ..వాడు తెగ ఆలోచించి స్విచ్చు మార్చాలి అని మార్చి చూసాడు కానీ వాడి తెలివి పని చేయలేదు . నేను సైలెంట్ గా వెళ్ళి దానిలో బేటరీ మార్చాను , అది పని చేయడం మొదలు పెట్టింది .ఇలాంటి చిన్న విషయాలు గుర్తుండవ్ మేడం అన్నాడు పేద్ద ఫోజుగా.....
ఇలా కాదు గాని నా దగ్గర పాడైపోయిన "dvd ప్లేయర్ ఉంది అది బాగు చేయడం నేర్చుకో అప్పుడు నీకు అన్ని పనులు వచ్చేస్తాయ్ అన్నారు .
అదేంటండి అది 3-ఇన్-వన్ కదా ప్లేయర్ పనిచేయకపోయినా రేడియో , టేప్ రికార్డర్ పనిచేస్తున్నాయ్ కదా అన్నాను .
దానికి మావారు వాడు వాటిని ఏమి చేయడులే నువ్వు ధైర్యంగా ఉండు అన్నారు. పాపం అసలే పిల్లలు గలవాడు ఏదైనా పని చూపిస్తే వాడే కాస్త నాలుగు రాళ్ళు సంపాదించుకుంటాడు. .
ఎలాగైనా వాడిని మాంచి పనివాడు కింద చేయాలని మా వారి ఆశ .
సరే ఏం చేస్తాం అని ఊరుకున్నాను .
ఎలాగో మా ఇంట్లోనే కూర్చుని కుస్త్తీ పట్టడం మొదలు పెట్టాడు .
ఈ లోగా మా బాబు బస్సు బొమ్మతో ఆడుకుంటూ వాడి పక్కనే కూర్చుని తను కూడా రిపేరు చేయడం మొదలు పెట్టాడు .
ఏంటమ్మా బస్సు పాడయిందా ఆగు నేను బాగుచేస్తా అన్నాడు , సరదాగా అంటున్నాడేమో అనుకున్నా ...
కాసేపటికి మావాడి ఏడుపు వినిపించించి వెళ్ళి చూస్తే బొమ్మ ఏ కీలుకి ఆ కీలు పీకి ఉన్నాయ్ ..వాడేమో ఊరుకో బాబూ ఊరుకో కొత్తది కొంటా అంటున్నాడు ..
హారి భగవంతుడా అనుకుని ..వాడిని అక్కడి నుంచి తీసుకు పోయి ఊరుకోబెట్టి ..
మా వారికి ఫోను చేసి చెప్పాను ..ఏమైనా అనుకోండి నేను మాత్రం ఇంక వీడిని పని చేయనివ్వను ,అని చెప్పి ,వాడిని పంపిచేసాను ,పాపం వాడు బిక్క మొఖం వేసుకుని వెళ్ళిపోయాడు .తర్వాత రోజు రేడియో లో పాటలు విందామని పెడితే దాని లోంచి ఎటువంటి చలనము లేదు ...ఇంకే ముంది మా వారి జాలి కి ఇది కూడా బలయ్యింది .
ఇంక మళ్ళీ మావారు వాడి పేరెత్తితే ఒట్టు ...కానీ విశ్వస నీయ వర్గాల ద్వార నాకు తెలిసిందేంటంటే ..వాడిని ఇంకా వదలలేదు మా వారు ...మా ఇంట్లో పాడయిపోయిన బొమ్మలు అవి వాడి కొలువు కు చేరుతున్నాయి( ట).
మా వారి స్నేహితుడొకడు ఒకరోజు మా ఇంటికి వచ్చాడు . మాటల్లో డైనింగ్ టేబుల్ చేయించుకోవాలనుకుంటున్నాఅన్నాడు అంతే మా వారు నా దగ్గర మాంచి తెలివైన పనివాడు ఉన్నాడు ,పని బాగా చేస్తాడు అని ,వద్దూ అని వెనుక నుంచి నేను సైగ చేస్తున్నా పట్టించు కోకుండా వాడిని పిలిచి పరిచయం చేసారు .ఇంకే ముంది తర్వాత రోజు నుంచి వాళ్ళింటికి వెళ్ళి డైనింగ్ టేబుల్ చేసే పని ఒప్పుకున్నాడు . వీడితో ఇంకెన్ని ఇక్కట్లు వస్తాయో అనుకుని మనసులోనే దేవుడికి ఒక దణ్ణం పెట్టుకున్నా.
కొన్ని రోజులు ప్రశాంతంగా గడిచిన తర్వాత ఒకరోజు మావారు సణుక్కుంటూ ఇంటికి వచ్చారు , మంచినీళ్ళిచ్చి చూస్తూ నిల్చున్నాను ..మళ్ళీ లోపలికి వెడితే ఎందుకో అడగలేదు అంటారు , అడిగితే ఇప్పుడేగా వచ్చాను అప్పుడే చెప్పాలా అంటారు .
మా వారే చెప్పారు మా వజ్రం గారిని డైనింగ్ టేబుల్ చేయమని చెప్పారు కదా ... (revolving daining table )టేబుల్ మధ్యలో disc లాగ తిరిగేటట్లు పెట్టమంటే ....వాడు తన వెరైటీ ఆలోచనతో టేబుల్ మాత్రం తిరిగేట్ట్లు పెట్టాడట లోపల ది మాత్రం కదలకుండా ఉందిట.
మరి వాడిని ఎందుకలా చేసావ్ అని అడగలేదా?
హా..అది కూడా అయ్యింది ....ఇదే ప్రశ్న వాడిని అడిగితే "సూపర్" లో షిండే లాగ నా పక్కనే కూర్చుని బాగా చేయ్ , జాగ్రత్తగా చేయ్ , ఆలోచించి చేయ్ అని మీ ఫ్రెండు నా బుర్ర తిన్నాడు అని చెప్పాడు ,
ఏది ఏమైనా వాడు అలా కూడా భలే ఆలోచింది పెట్టాడు కదూ ???
వాళ్ళమ్మ "సూపర్ఉమన్ " అనే ఫీలింగ్ వచ్చేసింది మా వాడికి ....
వాళ్ళమ్మ "సూపర్ఉమన్ " అనే ఫీలింగ్ వచ్చేసింది మా వాడికి ....
